Ang Ulirang Ina =)

Mula sa panulat  ni Meg

Ayon sa aking ina, ang dalawa sa importanteng taglay ng isang ulirang maybahay at asawa ay una: marunong itong magluto at ang ikalawa mahusay sa pananalapi.

Lumaki ako sa isang simple at payak na pamumuhay. Salat sa yaman at nakakaraos lang sa kinikita ng aking ama. Nasa ika anim na antas sa elementarya ang tinapos ng aking ina kaya naman lumaki itong sa paghahanap buhay at namasukan bilang kasambahay. Sa murang edad natuto ang aking ina ng mga gawaing bahay at sa aking paglaki nakagisnan ko ang isang ulirang ina na walang ninais kung hindi ang mapabuti ang kanyang maybahay at kanyang mga anak.

Kasiyahan ng aking ina ang makapaglingkod sa kanyang munting tahanan. Lumaki akong dala ang kanyang ala-ala saan man ako magpunta na kailangan at mahalaga na kumain sa umaga. Malayo man ako sa kanya ngayon batid ko na dahil sa mga nakikita ko, natutunan ko ang kahalagahan ng pagluluto at dapat taglayin ng isang kababaihan, maging ina man ito, anak o asawa. Ang katangiang ito ay isang paghahanda para sa isang mabuting ‘Reyna ng Kusina’ sapagkat dito nakasalalay ang kalusugan at kalakasan ng kanyang asawa sa pang-araw araw nitong gawain sa loob at labas ng kanilang tahanan at maging ang kanilang mga supling.

Dahil sa pagluluto, naibabahagi ng isang ina ang husay nito hindi lamang sa kanyang sarili kung hindi sa kanyang mga mahal sa buhay. Ang katangian na maaaring manahin ng kanyang mga anak. Ang inang marunong sa kusina ay maihahalintulad sa isang duktor na marunong maghain sa kanyang pamilya ng sapat na nutrisyon na kailangan ng kanyang mga anak para lumaki itong malusog at matalino. Ang kalakasan ng ina ay sya ring kalakasan ng kanyang mga anak.

Ang ikalawa, dapat taglayin ng isang mabuting maybahay ang kahalagahan ng pananalapi. Ang kahusayan sa paghawak ng salapi ay maihahalintulad sa tagapag-ingat ng yaman. Gaano man kalaki ang kinikita ng isang ama o asawa kung hindi maingat sa pananalapi ang kanyang maybahay, madali itong mauubos at tuluyang mawawala. Ang kahusayan ng aking ina pagdating sa larangang ito ay patunay na isa syang dakilang ina. Apat kaming magkakapatid subalit nairaos kaming lahat para makapagtapos ng kolehiyo sa kakarampot ng kinikita lamang ng aming ama. Si ina, bilang ingat yaman ay buong puso nitong tinatanggap ang hamon gaano man kababa ang sinasahod ng aking ama. Batid kong hindi sapat at minsan pa nga’y kulang ang sahod ng aking ama subalit wala akong narinig ni daing ng aking ina sapagkat batid ko ang hirap ng buhay noon at ganun din ang hirap ng aking aman sa paghahanap buhay. Sa papaanong paraan kami nakakakaraos, tanging ang aking ina lamang ang nakakaalam. Ang paghawak sa salapi ang isang sining na kailangan ng tamang paghahati-hati ng gastusin.

Hindi ko sukat akalain kung paano kami nakaraos noon. Nangungupahan kami ng maliit na bahay, nag-aaral kaming lahat at wala man lang tumigil kahit isa, ang gastusin sa bahay tulad ng pagkain, elektrisidad at tubig, paano kaya napagbabaha-bahagi iyon ng aking ina. Sya lamang ang nakakaalam.

Sa aking pagninilay nilay nabatid ko na mahalaga itong taglayin at patuloy na pagsikapang matutunan ang katangian ito ng isang kababaihan. Dalawang daan na magiging pag-asa para sa matagumpay na hinaharap ng isang pamilyang punong puno ng pagmamahal, at higit sa lahat pananampalataya kaakibat ang isang masaganang buhay sa hinaharap. =)